Промоција на книгата ,, Колку сме искрени да кренеме рака"

 Вчера, на 19.11.2025 година во КИЦ беше одржана промоцијата на романот за тинејџери ,,Колку сме искрени да кренеме рака" на авторката Маја Трајковиќ, роман за тинејџери. 

,,Се прашуваме ли каков свет сакаме и како да го постигнеме? И во овој стварниот и во оној дигиталниот? 

Во дигиталното доба прекинат е дијалогот меѓу нас возрасните и тинејџерите. Тие се домородците, а ние сме дојденците, но како што умееле нашите со нас, така и ние ќе знаеме како со нив, оти тие ги немаат нашите искуства, за да се справат со потешкотиите од светот, што им го нудиме откако се родени.

А, исти сме биле ко нив, сме имале криза на идентитет, бубулички, двоумења и симпатии. Само кога би знаеле тие дека сме биле исти ко нив, можеби би ни кажувале речиси се' и не би се затворале во своите соби( ќелии) осветлени од мониторите. А, таму...... "- кажа Маја Трајковиќ, автор на романот. 

Рецензент и промотор на книгата беше Лилјана Пандева, која кажа дека романот е ултра модерен и современ. Таа нагласи дека темите кои се обработуваат во романот претставуваат новина во овој жанр. 

На промоцијата со драматизација на делови од книгата учествуваа и ученичките Јана Китановска и Анастасија Тодорова од 9-1 одд. и добија бројни аплаузи за својата изведба од присутните на промоцијата. 

Во нашата библиотека веќе имаме примероци од книгата потпишани од авторката и првите читатели се веќе закажани.

https://novamakedonija.com.mk/pecateno-izdanie/dali-sme-onie-vistinskite-koga-sme-oflajn-ili-onlajn/

Промоција на книга Археолошка азбука и Археолошка Брајова азбука

Денес, 7.5.2025 во Домот на културата „Билјана Беличанец" се одржа промоција на книгите Археолошка азбука и Археолошка Брајова азбука на авторите Антонио Јакимовски, Елизабета Томевска - Илиевска и Маја Јаневска.  Главен покровител на овој настан е Градоначалникот Орце Ѓорѓиевски и е проект целосно поддржан од Општина Кисела Вода и реализиран во соработка со Институтот за европски образовни, социо- културни 

и економски политики Европа за тебе. Проектот дополнително се надгради со партнерството со Државното училиште за рехабилитација на деца и младинци со оштетен вид „Димитар Влахов", па се отпечати и Археолошката Брајова азбука..  

Двете дела се од големо значење за читателите бидејќи  се поттикнува нивната љубопитност, се збогатуваат знаењата, но во исто време се учи како се љуби својата земја, се зајакнува културниот идентитет, и во исто време претставува целосно инклузивно дело.  

Присутни на промоцијата од нашето училиште беа библиотекарката Наташа Старделова со учениците Јана Тренкоска, Софија Димеска и Андреа Радевска. 

Среќни сме и со нетрпение чекаме примерок од оваа интересна книга во нашата библиотека.

 

Од идеја до книга

 Денес, на 4.11.2024 година, во библиотеката на ООУ ,,Невена Георгиева -Дуња"  се одржа литературна работилница, како активност по повод Месецот на книгата. Работилницата ја водеше Елена Симоновска, автор на романи и поезија, која го објасни процесот на создавање на книжевно дело пред учениците од училиштето ,, Невена Георгиева Дуња" и три ученички од деветто одделение од нашето училиште, Андреа Пецевска, Меланија Ангелеска и Симона Јосифовска,  кои беа поканети од библиотекарката Маја Трајковиќ која беше и модератор на настанот. Гости на работилницата беа и библиотекарката Наташа Старделова и Валентина Терзиева - наставник по ТО и информатика, како дел од соработката на двете училишни библиотеки.

На работилницата во опуштена и пријатна атмосфера се поведе дискусија за инспирацијата, мотивите и процесот на пишување на книга, но и се споделија искуства и впечатоци од прочитани книги, како и совети за пишување. 

Со нетрпение очекуваме набрзо и ние да бидеме домаќини кога ќе ги поканиме пријателите од ова училиште на возвратна посета.

Промоција на ,,Пламен и непокор"

 Денес, 15.12.2023 год. во Порта Македонија беше одржана промоцијата на втората музејска сликовница насловена ,,Пламен и непокор", на авторките Ана Вишинова и Даниела Митевска. Ова е втора сликовница од ваков вид во издание на Музејот за македонската борба за самостојност, по првата од 2019 година ,,Зад големата мисла". Ова издание го покрива периодот на Илинденското востание и веруваме ќе претставува значајно наставно помагало во образовниот процес на часовите по историја.

Од нашето училиште претставници беа наставничката по македонски јазик м-р Валентина Трајкоска и библиотекарката Наташа Старделова и ученичките Мила Цветковска, Мила Станкоска и Јована Јовановска. 

Очекуваме и ова издание, како првото, да наиде на голем одзив и да се користи во секојдневниот образовен процес, а примероците на двете сликовници веќе ги красат полиците на нашата библиотека.

На промоцијата со своја музичка нумера се претставија и Симона Трајкоска, на гитара и цитера, и Оља Алексовска, вокал.