ИЗВЕШТАЈ
за НАСТАВА ВО ПРИРОДА во V одделение
во учебната 2024/25 година
Според планот и програмата за петто одделение, наставата
во природа требаше да де реализира од 7.4.2025 до 11.4.2025, но поради
временските услови истата се одложи за еден ден подоцна, односно од 8.4.2025 до
12.4.2025. Наставата во природа беше организирана од страна на Туристичката
агенција „Кондор“.
На
8.4.2025 вторник започна нашето
кратко, но многу убаво патување.
Во 8 часот и 30 минути, 19 ученици од V1 и 17 ученици од V2 заедно со нивните наставнички Нена Цветковска и Билјана
Петрушевска, дефектологот, Цветана Зафировска, и директорката Елена Симоновска
тргнаа од село Драчево кон Струга. Во автобусот исто така беа и пратителот на
групата Гоце Танески и медицинското лице Снежана Талевска.
Патувањето го продолживме кон Тетово. Таму ја посетивме
Шарената Џамија каде што децата освен што беа воодушевени од живописните бои со
кои истата беше нацртана, исто така многу интересно им беше што требаше да ги
собујат патиките за да влезат во џамијата и при тоа не смееја да згазнат на
тепихот. Потоа се упативме кон селото Вруток каде што имавме можност да го
видиме изворот на реката Вардар. Децата беа изненадени од чистата, бистра и
многу студена вода. Патувањето го продолживме кон Маврово каде што имавме
можност да го видиме Мавровското Езеро и прекрасната зимска бајка. Потоа го
посетивме машкиот манастир „Св. Јован Бигорски“ каде што имавме можност
свештеникот накратко да нѐ запознае со дел од историјатот на овој манастир.
Следната наша посета беше женскиот
манастир во село Рајчица. Попатно уживавме во прекрасните бистри тиркизни бои
на реката Радика, Дебарското Езеро и езерото Глобочица. Во попладневните часови
пристигнавме во Струга, во хотелот „Солферино“ во кој бевме сместени пет дена. По
краткиот одмор од патувањето имавме вечера.
Вториот ден веднаш по доручекот се упативме кон разглед
на позначајни места во Струга како што се истекот на реката Црн Дрим од
Охридското Езеро, Музејот „Д-р Никола Назлобински“, „Спомен куќата на Миладиновци“
и чаршијата. Најголем впечаток на децата им оставија препарираните животни во
музејот. Во пладневните часови се вративме во хотелот каде што имавме ручек,
пладневен одмор, спортски активности, наставни активности а потоа вечера и
малку забава.
Третиот ден во утринските часови, после доручекот се
упативме кон Охрид, најубавиот град во Македонија. Во Охрид ја разгледавме
чаршијата, црквата „Св. Јован Канео“, Самуиловата тврдина, црквата „Св. Климент
Охридски“ – Плаошник, го видовме и 100 годишното дрво - Чинарот, прекрасните
бродови на пристаништето а на крај се упативме кон Билјанините извори и го
посетивме мрестилиштето на пастрмката. Децата беа воодушевени од Охридските
убавини. По напорната прошетка следуваше ручекот, а потоа одмор, спортски активности,
наставни активности, вечера и малку забава.
Четвртиот ден како и сите претходни активностите ни
започнаа во утринските часови, по доручекот се упативме кон Вевчанските извори,
местото исполнето со звуци од природата, а потоа ја посетивме воденицата и на
крај се упативме кон манастирскиот комплекс Калишта. Во
Калишта се запознавме со културните и историските знаменитости. Во
попладневните часови се вративме во хотел за ручек и активностите кои ги имавме предвидено: одмор, спортски активности, наставни активности, вечера
и забава.
Петтиот, воедно и последниот ден од нашето патување
во утринските часови по доручекот се упативме кон Крушево. Во Крушево ги посетивме „Спомен куќата на Тоше Проески“ , неговиот гроб, а потоа и Македониумот во кој е сместен и гробот на Претседателот на
Крушевската Република – Никола Карев. По ручекот во Крушево (ланч пакет), во попладневните часови пристигнавме во село Драчево.
Како спомен на секој ученик ќе му остави своерачно
изработената книга на впечатоци, во која се запишани сите посети, опишани
историски места, применети охридско-струшките дијалекти, математички задачи со
поминатите километри а секако и најубавите спомени преку неколку избрани
фотографии.
Одделенски наставници: Нена Цветковска и Билјана
Петрушевска
Дефектолог: Цветана Зафировска
