Извештај за реализација на тридневна наставно-научна екскурзија за
IX одделение во период од 06-08.04.2026 година
Скопје-Охрид
Во периодот од 6 до 8 април се
реализираше тридневната екскурзија за деветто одделение низ западна Македонија
со туристичката агенција Кондор. Учениците беа придружувани од одделенските
раководители на 9-1 и 9-2 Емилија Филипоска и Душица Алексиевски-Гулабоски. Вкупно
од двете одделенија присуствуваа 39 ученици. Патувањето започна во 8:30 часот. Прва
дестинација за посета беше Вруток, изворот на реката Вардар. Учениците уживаа
во убавото време и кратката прошетка до изворите. Потоа се упативме кон Маврово.
Направивме кратка пауза во Маврови Анови. Следна станица беше Трница. Оваа пауза
ја искористивме за освежување и ужина. Потоа, после краток пат го посетивме манастирот
Св. Јован Бигорски. Автобусот застана на паркингот крај патот, што им овозможи
на учениците да прошетаат по патеката/улицата нагоре кон манастирот. По пристигнувањето
во манастирот, учениците слушаа предавање при што се стекнаа со информации за
тоа кога е изграден, какви поважни настани се случувале низ историјата и колку
е манастирот важен за христијанството во Македонија и општо во светот. Запаливме
свеќи за здравје и многумина од учениците купија црковни сувенири и крстена
вода. На патот кон Дебар попатно ги
видовме Дебарското езеро и манастирот Рајчица. Заради недостаток на време,
разгледот на манастирот беше панорамски. Во попладневните часови се упативме
кон Струга, каде направивме подолга пауза за ужина и освежување. Учениците прошетаа
по корзото долж реката Дрим и се одморија во кафулињата и на клупите на кејот и
уживаа во пријатното време. Последна станица за првиот ден беше Охрид и хотелот
каде што требаше да се сместиме, т.е. Хотел Амбасадор.
Персоналот на хотелот беше многу љубезен и ни излезе во пресрет за секоја
ситуација. Собите беа удобни и чисти. Откако се сместивме по соби, следуваше
краток одмор, а потоа и вечера. После вечерата следуваше заедничка дружба на
двете паралелки (во хотелот), а потоа дојде време и за сон.
Вториот ден на програмата беа
посета на Заливот на коските и манастирскиот комплекс Св.Наум. После доручекот
се спремивме и тргнавме. Во Заливот на коските учениците слушаа подетално
предавање за наколната населба, какви видови на ендемични риби постоеле, од
какво дрво биле изградени и сл, а потоа ја разгледаа праисториската наколна
населба, влегоа во куќарките и се фотографираа. Краток одмор имавме на патот
кон Св. Наум. Таму ги разгледувавме убавините на комплексот, изворите на реката
Црн Дрим, а имаше и доволно време за кратко освежување и уживање во прекрасното
време. Влеговме и во внатрешноста на манастирот каде што нé пречекаа познатите
пауни со широко отворени пердуви, кои секогаш претставуваат атракција за посетителите.
Учениците запалија свеќи за здравје и имаа можност да направат прекрасни
фотографии. Се вративме во хотелот, имавме ручек, а потоа одмор. Дестинација за
втората половина од овој ден беше Вевчани. Таму направивме кратка прошетка
покрај Вевчанскиот извор, видовме стара воденица, а кажавме и збор- два за
далеку прочуениот Вевчански карневал. После
оваа прошетка се вративме на вечера и повторна дружба на двете паралелки.
Третиот ден после појадокот,
учениците ги средија собите, се спакуваа и ги ослободивме собите од хотелот. Следеше
една навистина пријатна прошетка низ Охрид. Најпрво бевме во Плаошник. Учениците
имаа можност да разгледаат наоколу, да влезат во црквата и да ги видат и
прекрасните мозаици кои сéуште се ископуваат. Следно се придвиживме кон Св. Јован
Канео, амфитеатарот и потоа преку плажата Потпеш дојдовме до центарот на градот
и преку прошетка по брегот, стигнавме до Капетанијата, а потоа и до Биљанини извори.
После оваа убава и долга прошетка, се вративме во хотелот на ручек. Веднаш по ручекот,
појдовме назад кон Драчево. Попатно имавме само една станица за пауза и ужина на
Стража. Уживавме во познатите мекици и се дружевме. Во Скопје и Драчево пристигнавме
околу 18:00 часот.
Екскурзијата ги зближи
учениците на двете паралелки и им овозможи нови знаења и пријатни искуства.
Одделенски раководители
Емилија Филипоска IX-1 одд
Душица Алексиевски-Гулбоски IX-2 одд
No comments:
Post a Comment