Денес, 19.11.2025 година, во просториите на нашето училиште се оствари средба со советничката Ирена Борисовска и наставниците кои предаваат во предметна настава. Се дискутираше за новините воведени од оваа учебна година кај седмоодделенците со новиот предмет кој се воведува годинава Општествено хуманитарна работа (ОХР).
Во современиот свет младите се соочуваат со бројни општествени и хуманитарни предизвици кои бараат од нив свесност, емпатија и проактивен ангажман. Разбирање за овие предизвици како и развивање на чувство за општествена одговорност и активно граѓанство учениците го добиваат преку директно ангажирање во општествено -хуманитарна работа. Преку ангажирањето во ваква работа учениците во училиштата треба да стекнат знаења, вештини и искуства што се потребни за да научат како да придонесуваат за развој на нивната заедница и, пошироко, за општеството. Преку учеството во општествено -хуманитарна работа учениците се вклучуваат во решавање прашања од реалниот свет, ги разбираат различните перспективи и соработуваат со своите врсници на проекти кои произлегуваат од потребите на заедницата и општеството. Ваквата работа не е само образовно искуство, туку и платформа за личен развој поради тоа што дава можност учениците да размислуваат за нивната улога во светот и како можат позитивно да влијаат во изнаоѓање решенија за различни општествени проблеми и, на тој начин, да им помагаат на другите. Во основното образование општествено -хуманитарната работа е наменета за ученици од третиот период на основното училиште (7.-9. одделение) кои се наоѓаат во клучната развојна фаза во која младите почнуваат да формираат сопствени идентитети, вредности и верувања. На оваа возраст, учениците се способни за критичко размислување и сѐ повеќе се свесни за општествените и хуманитарните прашања околу нив. Преку општествено-хуманитарна работа оваа свест се канализира во конструктивна акција, насочувајќи ги учениците да станат информирани и сочувствителни граѓани. Со фокусирање на оваа возрасна група и ангажирање во овој вид работа се воспитуваат генерација млади луѓе кои не само што ќе бидат свесни за предизвиците со кои се соочуваат нивните заедници, туку и ќе се оспособат да преземаат акција. Со очекува овој ран ангажман во општествено -хуманитарна работа да им помогне на учениците да развијат доживотна потреба за давање позитивен придонес во општеството.
No comments:
Post a Comment